الفصـــل الأول
المشهد الأول
تفتح الستار علي خلفيه صحراء وبها مجموعة من الصخور
شوقي : أنا .... ما عملتش حاجه كل اللي في جيبي طلعتهولكم
الريس : ها ها ها ... ما إحنا عارفين إنك طلعت كل اللي في جيبك لكن
إحنا بنتكلم علي الكنز اللي إنت خافيه في بيتك مكانه فين
شوقي : كنز في بيتي ...... أنا معنديش كنز ولا حاجه
الحنش : إظاهر انه بيستهبل يا ريس
الرئيس: علي العموم إحنا هانعرف إزاي نخليه يتكلم ..... يا سوسه
سوسه : نعم ياريس
الرئيس: طبعا إنت فاهمه انا عايز إيه ؟
سوسه : طبعا ياريس .. ودي تخفي عني ....عيب ما أبقاش تلميذتك ياريس
تخرج سوسه لتحضر الطفل والزوجه
الريس: إنت قلتلي إبنك سنه كام .........ها ها ها
تدخل سوسه ومعها الطفل والزوجــه
الولد : بابا ........... بابا
الزوجه : يا شوقي الحق إبننا
الريس: إستني انت يا حلوه ........دورك جاي بعدين
شوقي : لا كله الا ابني ومراتي ..... صدقوني أنا معنديش كنز ولا
حاجه أنتو أخذتوا كل اللي معايا
الريس: إحنا ها نصدق بعد ما نعمل حاجه بسيطه ....يا حنش.ابتدي
شوقي : ايه ها تعمل ايه للواد
الحنش : أنا حاسس إن ضوافره كبيره شويه ( ثم يمسك بكماشه ليخرج ظفر
الولد ) لازم نشيلهالو ..... إيه نبتدي بالضفر ده
شوقي والزوجه: لا .....لا ...... إبني
الولد : اه ...... اه ... صباعي ......صباعي
الزوجه : يامجرمين ..... قطتعوا صباع إبني يا متوحشين
الريس : قلتلك إقعدي ساكته ..... ها ها هتقول علي مكان الكنز ولا لأ
شوقي : يعالم صدقوني أنا معنديش كنز.
سوسه : يظهر كده ياريس الناس دول مابيكدبوش .... ايه العمل دلوقتي
الريس : مادام مفيش منهم فايده يبقي إخلصوا منهم بس ياريت بسرعه علشان دول صعبوا عليا
الحنش وسوسه : حاضر ياريس ....( ثم يقتلا الأب والأم بالسكين)
الريس : دي أخره اللي ماينفذش أوامرنا
حاولوا تتاووهم بسرعه علشان في أوتوبيسات كتير علي الطريق
دميانه : لأ مش قادره اه ...اه ... لأ....لأ
( تصرخ دميانه من خارج المسرح )
الريس : ايه .... ده ... ده في حد هناك روحوا إتلفوهم بسرعه
الريس :إمسكوهم دول شافوا كل حاجه ... وعرفونا أوعوا يهربوا منكم
إيزابل : خلاص ياريس تويناهم
( يعود الحنش و وتعود سوسه مره أخري )
سوسه : ...... هربوا ياريس
الحنش: بس إحنا عرفنا هما هربوا وراحوا فين
الرئيس : لازم نمسكهم بسرعه لانهم عرفوا سرنا قولولي بسرعه هما راحو فين
سوسه : دخلوا بيت المعوقين اللي علي أول الطريق ياريس
الريس : يعني ما لقوش غير البيت ده يدخلوه ... خلاص يبقي كل اللي
علينا إن احنا نراقب البيت لحد ما نمسكهم ودي مهمتك يا حنش
الحنش : حاضر ياريس
الريس : تخلي بالك إن مفيش حد يدخل ولا يخرج أما انت يا إيزابل عليكي تدخلي البيت لان
مفيش حد فيهم شافك معانا وتعملي كل اللي هاقولك عليه .
المشهد الثاني
( ثم يضي المسرح وخلفيه المنزل وبه مجموعه كراسي وترابيزه)
بولس : إمسكي نفسك يادميانه مش كده اهم بسسببك عرفونا وهايجوا ورانا واكيد ها يقتلونا .
دميانه : ما أنا مقدرتش أمسك نفسي
راعوث : إحنا ايه بس اللي وقعنا في المصيبه دي ..يعني لازم الاتوبيس يعطل بينا في
المنطقه المقطوعه دي
ابرام : ايه البيت اللي احنا فيه ده .. ما يمكن يكون بيت العصابه وإحنا استخبينا فيه
بولس : لألأ ... ده مش شكله بيت العصابة خالص ده بيت زي مايكون مهجور
واستحاله يكون بيت العصابه شايفين الأيات المكتوبه علي حيطان البيت
دميانه : و لا تكن زينتكن الزينة الخارجية من ضفر الشعر و التحلي بالذهب و لبس الثياب
(1بط 3 : 3)
بولس : لا تكونوا معلمين كثيرين يا اخوتي عالمين إننا نأخذ دينونة أعظم (يع 3 : 1)
راعوث: فقال لهم ما بالكم خائفين يا قليلي الأيمان ثم قام و انتهر الرياح و البحر فصار هدوء
عظيم (مت 8 : 26)
إبرام : لانه ماذا ينتفع الانسان لو ربح العالم كله و خسر نفسه (مر 8 : 36)
( ثم تدخل فتاه عمياء هي الأم)
الأم : إيه ده أنا حاسة إن في ناس غريبة
(كل الخدام يوجهون نظرهم اليها ).
بولس : ايه ده انتي مين ؟
الأم : إنتوا اللي مين ؟
راعوث : إنتي أكيد واحده من العصابه يالا إتكلمي
الأم : عصابة ... عصابة إيه اللي إنتوا بتتكلمواعليها وبعدين إزاي أكون واحده من وأنا
ما بشوفش
دميانه : معلش يا .... أصل إحنا عدينا في موقف صعب جدا. ياه
الأم : خير يا ساتر يارب هو إيه اللي حصل
بولس : إستنوا يا جماعه أنا بس اللي هاحكيلها
الأم : طيب مش تعرفنا مين سياتك قبل ما تتكلم
بولس : أنا بولس اللي ماسك الخدمه في كنيستنا ودول الخدام اللي معايا
الام :ودلوقتي ياأستاذ بولس مش تعرفنا علي الخدام اللي معاك
بولس : اه صح كلامك أنا كنت بأقول كده برضه دي دميانه
دميانه : أهلا
بولس : وده إبرام
إبرام : أهلا وسهلا
بولس : ودي راعوث خادمه صغيره معانا
راعوث : ....... ايه ....... أهلا وسهلا
الام : أهلا وسهلا بيكم في بيتنا ... احكيلي بقه ايه اللي حصل ؟
بولس : ياستي إحنا كنا طالعين رحله تبع الكنيسة واحنا ماشين عطل بينا الأتوبيس ... فقلنا
نتمشى شويه رحنا شفنا جريمه علي الطريق ... عصابة بتقتل أسره للأسف شافونا
بعد ما دميانه صرخت ... رحنا هربنا وجينا علي هنا
الام : ياه أنتو مريتوا بظروف وحشه خالص أكيد إنتوا دلوقتي عايزين تستريحوا
دميانه :اه ياريت ده أنا تعبانه جدا هو لو سمحت المكان اللي هانريح فيه نضيف
الام : المكان كويس مش بطال يا أنسه دميانه
بولس : غريبه إنتي عرفتيها إزاي انها دميانه
الام : أنا كنت عايزه أعرفكم علي أسرتي اللي أنا عايشه معاهم هنا ودول اللي
هايوصلوكم للمكان اللي ها تستريحوا فيه .. يا شوشو .. يا لولو .. تعالوا وهاتوا كركر معاكم
شوشو ولولو : حاضر يا ماما ( ثم يدخلون الي المسرح )
شوشو : إيه ده يا أمي هو إحنا عندنا ضيوف
الأم : لأ ... ضيوف ايه دا دول أصحاب البيت
راعوث : بس انا عايزه أسالك سؤال هو إيه الأسماء الغريبه ديه دي أسمائهم الحقيقه
الام : إنتي قصدك علي شوشو و لولو و كركر
راعوث : اه .... بالظبط كده أصل لازم ما أفوتش حاجه حتى لو كانت
الام : حتي الحاجه البسيطه دي .... علي العموم ياستي دي أسماء الدلع بتاعتهم ودلوقتي يا أستاذ
بولس إنت وخدامك ها تروحوا مع شوشو و لولو و كركر يعرفوكم المكان اللي هاتسريحوا فيه
( ثم يخرجون جميعا وتبقي الام في المسرح تصلي )
الام : يارب يسوع أرفع صلاتي وشكري إليك لأنك إنت الإله الوحيد الحنان اللى بترعانا في كل أمور حياتنا لو مكنتش انت الهي ولو غيرك بيتحكم فينا كان هايبقي ايه مصيرنا دلوقتي احنا عجزه وانت قلت يارب " بدوني لا تقدرون ان تفعلوا شيئا (يو 15 : 5)
احنا يارب بنطلب منك أن تحامي عن خدامك إحنا العجزه مش هانقدر نحامي عنهم واجعلهم يارب يكونوا سبب بركه لينا ويعرفونا كلمتك ونطلب منك يارب إنك تحرسهم وتحرسنا بشفاعه القديسه مريم وبصلوات الشهيد العظيم مارجرجس ومارمينا وأخيرا يارب وليس أخرا أجعلني مستحقه أن أقول لك بشكر أبانا الذي في السموات ..........
(يغلق الستار وهي تصلي )
++++++
الفصل الثاني
المشهد الأول
(يفتح الستارعلي المنزل ثم تدخل ايزابل )
ايزابل : هو ده المكان ... اه يبقي أنا هابيتدي أنفذ الخطه اللي قالي عليها
الريس .... ياناس ياللي هنا ... مفيش حد يساعدني
( تدخل لولو وشوشو و كركر )
لولو : خير .. إيه في ايه... انتي مين
ايزابل : معلش يا جماعه ممكن تستحملوني لحد ما أصلح العربيه بتاعتي
أصل العربيه بتاعتي عطلت هنا جنب البيت بتاعكوا
شوشو : بس انتي مين حضرتك
ايزابل : أنا أسمي ... أسمي إيزابل
كركر : ( بالاشارات ) يا شوشو يا لولو ندي خبر لأمنا
إيزابل : هي بتقول ايه
لولو : لمؤاخذه ذي ما إنتي شايفه إحنا كلنا لينا احتياجات خاصة
شوشو : وعلي العموم ..هي بتقولنا إن إحنا لازم ننادي علي أمنا وهي ذينا كده بس إحنا بنعتبرها ذي امنا
ايزابل : اه ... ومالو ... كمان نتعرف عليها ... بس هو فيه حد تاني هنا في البيت
لولو : حد تاني ..... قصدك إيه
ايزابل : لا .... أنا بس بسأل
شوشو : طيب انتي يا لولو خدي كركر وأدي خبر لأمنا بوجود إيزابل
لولو : حاضر يا أختي
( تدخل دميانه وهي تقول )
دميانه : يا شوشو انتي رحت فين ... ايه ده ... هو في حد معاكي
إيزابل : مش تعرفيني يا شوشو
شوشو : دميانه الاتوبيس بتاعها عطل فجات هي وبعض الخدام لغايه لما أتوبيسهم بيتصلح
إيزابل : أهلا وسهلا ... أنا إيزابل عربيتي عطلت ذي الاتوبيس بتاعكوا
دميانه : أهلا " ثم توجه حديثها الي شوشو"
أنا رحت المكان ده لقيته مش متوضب وكمان مش نضيف فلو سمحت نضفيه
بسرعة
شوشو : حاضر ... أنا هاروح أوضب المكان بسرعة
ايزابل : ايه ده ... هو إنتي إزاي تقعدي في البيت الوحش ده... دا حتي تحسي إنه كئيب
دميانه : اه ... نعمل ايه اللي لقناه في وشنا
ايزابل : علي فكره ... أنا بيتي قريب علي بعد 3 كيلو من هنا ايه رأيك
بعد ما أصلح عربيتي تيجي معايا
دميانه : هو البيت بتاعك ده ... ذي المكان اللي احنا فيه
ايزابل : لأ طبعا ... ده في جنينه وبيسين .. دي فيلا يا دميانه دا أنا لو حكيت لك علي
مدخلها ولا بابها الواسع جدا وكمان طريق المدخل اللي سهل ورحب
دميانه : الله ... أنا هاروح أكلم زمايلي علشان نروح الفيلا بتاعتك
ايزابل : طيب يالا روحي بسرعه وأنا مستنياكي هنا
( تتحدث إيزابل فى الموبايل )
ايزابل : ألو ... أيوه ياريس كله تمام الخطه ماشيه زي ما أنت رسمتها
بالظبط وقريب ها طلعهم من البيت وانا ناويه ....
( تدخل الام فتتلعثم ايزابل)
ايزابل : طب يالا تعالي بسرعه
الام : أهلا وسهلا يا بنتي فيه أي خدمه ممكن أقدمها لك ؟
ايزابل : هو حضرتك من سكان البيت ده .
الام : أيوه يابنتي ... بناتي قالولي ان عربيتك عطلت فلو انتي عايزه تقعدي معانا إتفضلي
وربنا ها يساعدك لو انت فعلا صادقه
ايزابل : لا أقعد ايه .... أنا شويه وهامشي بس عربيتي تتصلح
الام : طيب ..... تعالي يا بنتي أوريكي مكانك
ايزابل : بس ياريت يكون قريب من الباب
ثم تأخذ الأم ايزابل وتخرج وتدخل دميانه متأففة
دميانه : أف أنا مش قادره ... ده مكان أقعد فيه
شوشو : يا أختي دميانه
دميانه : لا أنا مش أخت حد
شوشو : أنا أسفه يا أنسه دميانه متبصيش للشكل اللي من بره المهم المحبه اللي جوه البيت
دميانه : محبه ايه ... لا طبعا أهم حاجه الشكل الخارجي ولا أنت علشان
شوشو : ربنا يسامحك بس أنا عايزه أفكرك وأقولك حاجه أكيد انتي عارفاها لانك خادمه في
الكنيسه
دميانه : حاجه أنا عارفاها في الكنيسه ... ايه هي دي
شوشو : دي ايه في الكتاب المقدس بتقول " ان الله لا ينظر الي العينين بل الي القلب "
(ام 23 : 26)
دميانه : انتي بتقولي ايه ... أنت هاتوعظيني وانا خادمه في الكنيسه
شوشو : أخطيت سامحيني
دميانه : خلاص خلاص .... إحنا ان شاء الله هانمشي ونروح عند مدام
ايزابل في الفيلا بتاعتها هناك اللي بابها واسع وطريقها سهل
شوشو : بس انت واثقه من ايزابل ... مش ممكن تكون من العصابه وعايزه تئزيكم
دميانه : إنتي بتقولي ايه
شوشو : أنا خايفه عليكي
دميانه : لا متخافيش .... دي واحده غنيه وعندها فيلا بالمواصفات اللي
قلتلك عليها .... إزاي تكون شريره
شوشو : ما أرحب الباب وأوسع الطريق المؤدي الي الهلاك .... خلي
بالك يا دميانه ..... وعلي فكره انتي مشفتيش جمال البيت بتاعنا
دميانه : البيت بتاعكوا ... الضيق .. اللي كل حاجه فيه كئيبه.
شوشو : تعالي معايا .. وانا أوريكي جمال البيت بتاعنا
دميانه : إتفضلي
ويخرج الاثنان من المسرح ثم يدخل بولس وفي يده الكتاب المقدس ويقراء بصوت عالي ويقول
بولس : روح الرب علي لانه مسحني لابشر المساكين ارسلني لاشفي المنكسري القلوب
لانادي للماسورين بالاطلاق و للعمي بالبصر و ارسل المنسحقين في الحرية (لو 4 : 18)
ايزابل : الله .. الكلام ده كأنه مكتوب علشانك
بولس : ايه ده .... انتي مين
ايزابل : أنا ايزابل .... انت متعرفنيش
بولس : اه اعرفك دميانه قالتلي عنك .. أحب أعرفك بنفسي .. أنا بولس
ايزابل : أكيد لازم تبقي بولس .. اللي بيتكلم بالثقه دي لازم يكون بولس مش أقل من كده
بولس : اه ..ذي متقولي كده ربنا مديني مواهب كتير ..انتي مشفتنيش أنا بأوعظ
ايزابل : أنا وأسرتي عايزين نتعلم ومحتاجين واحد يكون زيك عنده علم
غزير وليه أسلوبه القوي الجذاب زيك
بولس : انتو أكيد مفيش حد بيفتقدكوا ومابتروحوش الكنيسه صح ؟
ايزابل : صح ... ايه ده انت عرفت ازاي
بولس : دي البصيره اللى ربنا مديهاني ودي من المواهب اللي عندي
ايزابل : خلاص .. يبقي أنا مستنياك أنت ودميانه في الفيلا بتاعتي
بولس : بس أنا ...
ايزابل : لازم تيجي مع دميانه لازم ( ثم تخرج من المسرح)
بولس : كده الخدمه الصح في فيلا وناس نضيفه ناس تعرف تقدر موهبه الوعظ اللي عندي
تدخل الام أثناء حديث بولس
الام : أستاذ بولس
بولس : أهلا ... أنا عايز أعرف إنتي بتعرفينا إزاي
الام : ياتري حضرتك مستريح معانا هنا في البيت ده
بولس : اه ... الحمد لله ... بس أنا كنت عايز أسال حضرتك كام سؤال
الام : اتفضل اسأل
بولس : انتي أزاي قادره تعيشي في الظلام ده وازاي بتحسي باللي حواليكي
الام : دا أنا عايزه أسأل حضرتك ياأستاذ بولس ... ده حضرتك اللي ها
تفيديني لان في ايه في الكتاب المقدس كنت عايزه أعرف معناها
بولس : اه اتفضلي ... أي سؤال أقدر أجاوبللك عليه ايه هي الايه
الام : " سراج لرجلي كلامك و نور لسبيلي (مز 119 : 105) "
بولس : دي ايه بسيطه خالص .... أشرحهالك دي معناها ان كلام الله هو النور اللي بينور
قدام رجلنا علشان ما نتكعبلش واحنا ماشين في حياتنا وهو النور لطريقنا علشان نقدر
نبعد عن العدو ونوصل للسما
الام : ده كلام حلو خالص بس هل ياتري ان كل اللي بيسمع كلام الله بيوصل ليه لمجرد انه
بيسمع كلام ربنا بس
بولس : لا طبعا الكتاب المقدس بيقول " كونوا عاملين بالكلمة لا سامعين فقط خادعين نفوسكم
(يع 1 : 22) "
الام : خلاص ... شكرا يا أستاذ بولس ... بعد أذنك وتخرج
بولس : بس برضه ... ماجوبتنيش علي سؤالي ... وايه قصدقها من كلامها معايا .. انا هاتعب نفسي
ليه .. أنا أكمل قرايتي في الانجيل
( ثم يستمر في قراءه باقي الاعداد في سفر لوقا وهو يخرج وتدخل كركر و معها راعوث )
راعوث : تعالي ... يا كركرنقعد هنا بدل الكتمه اللي فوق
كركر : تجيب بالايماء
راعوث : تعرفي يا كركر أنا حاسه ان العصابه كدة كده هاتيجي وهاتخلص علينا
كركر : (بالاشارات) لا ماتخافيش لأن احنا مش لوحدينا احنا معانا ربنا
راعوث : أيوه انا فاهمه قصدك ان احنا مش لوحدنا وربنا موجود بس انا عايزه أقولك علي
حاجه بصراحه كده لو جيه أصغر واحد من العصابه هايموتنا كلنا واحنا يادوب
شويه خدام ملناش في الخناق وانتو ..... متزعليش مني
(تذهب كركر الي منضده وتمسك بيدها ثقاب كبريت وتشير اليها لكي تكسره)
راعوث : ايه مش فاهماكي يا كركر عايزه ايه .... اه أكسر عود الكبريت
( تشير اليها كركر لكي تكسره )
راعوث : خلاص ... خلاص ... حاضر ياستي أهوه أديني كسرته .. طيب وبعدين
(كركر تعطي لها عودا أخر )
راعوث : ماله العود التاني ده كمان
( كركر تشير اليها بالانتظار ثم تعطي لها مسمار وفتله )
راعوث : ايه الفتله والمسمار دول لزمتهم ايه
( تشير كركر لراعوث بأن تربط عود الكبريت والمسمار معا بالفتله)
راعوث : اه أربطهم ببعض ...... حاضر ياستي
( تشير كركر لها بأن تكسرهم )
راعوث : أكسرهم ازاي ده مستحيل ...... أنا مش فاهمه منك أي حاجه يا كركر ... ماعلينا ...
أنا عماله أتكلم كأني بأكلم نفسي .... ياربي أنا ذهقت أنا ما بعرفش أعمل أي حاجه
مفيش حاجه عملتها ناجحه في حياتي أنا ولاحاجه
(أثناء ذلك تخرج كركرثم تدخل ايزابل )
راعوث : ودلوقتي يارب احنا هانعمل ايه في المشكله اللي وقعنا فيها دي
ايزابل : مشكله أنا سمعتك بتقولي مشكله ... ايه هي المشكله دي
راعوث : ايه ده ..... مين انتي
ايزابل : أنا ايزابل
راعوث : وانت عايزه ايه مني
ايزابل : أنا عايزه أحل لك المشكله اللي كنت بتكلمي عليها
راعوث : مشكله ... مشكله ايه اللي انت بتقولي عليها مفيش مشاكل
ايزابل : براحتك أنا كنت هاديلك الامان
راعوث : تديني الامان ..... ازاي يعني
ايزابل : قوليلي الاول انتي خايفه من ايه وأنا ها قولك
راعوث : أنا هاقولك بس هاتقدري تديني الامان زي ما بتقولي
ايزابل : اه طبعا فيلتي فيها الامان كله دي فيها أنواع الحراسه اللي بتحمينا من كل خطر
راعوث : صح .... بتتكلمي بجد
ايزابل :طبعا
راعوث : يعني ها تقدري تحمينا من العصابه
ايزابل : عصابه ... عصابه ايه
راعوث :هو انا قلت عصابه... انا دايما كده أغلط في الكلام
ايزابل :قلتلك الامان عندي
راعوث : أصل القصه هي ان .............. وده كل اللي حصل
ايزابل :ياه دا انتو واقعين في مشكله خطيره
راعوث :مش بأقولك شكلك مش هاتقدري تنقذينا
ايزابل :عيب ده انا الامان في العالم كله
راعوث : في العالم كله
ايزابل :مش العالم ... انا قصدي الحته اللي احنا فيها يعني تقدري تقولي ان أنا لي سلطان
علي الارض دي كلها واكيد طبعا هاتيجي معانا
راعوث : معاكو ..... مين دول
ايزابل : دميانه وبولس ..... علشان تتطمني يا ستي
راعوث :خلاص اذا كان كده .... ماشي مادام في ناس أعرفهم رايحيين معاكي ... وبتقولي
ان الامان عندك ... خلاص مفيش مشكله هاجي معاكي .... طيب بعد اذنك انا
اروح اجهز حاجاتي علشان أروح معاكي
( ثم تخرج ) ( يدخل ابرام )
ابرام : مساء الخير ....... ايزابل مش كده ؟
ايزابل : أيوه كده .... انت عرفتني ازاي ؟
إبرام : د ى سمه رجال الإعمال يعرفوا البيزنس بتاعهم من اول نظرة….ثانيا زى ما انت
شايفة انا ما بضيعش وقت….
ايزابل :انت فعلاً… جيت للشخص المناسب
إبرام : أنا سمعت إن عندك فيلاًً واسعة … صح
إيزابل : طبعاً ….. دى جميلة جداً وكمان جنبها مساحة أرض كبيرة ملكى
أبرأم : كبيرة قد اية يعنى
ايزابل : بتسأ ل على مساحتها لية
إبرام : أصل أنا بافكر في مشروع ها يكسبها دهب
أيزبل : غريبة … أنا سمعت إنك إنت خادم … وإنا مش شافية الحاجة دي فيك
إبرام : ولا غريبة ولا حاجة ….. الواحد لازم يستفيد من أي فرصه تجيله حتي لو كانت في
الكنيسه أو الخدمه لازم الواحد يسعي …. أسعي يا عبد وأنا أعينك
ايزابل : وايه المشروع اللي انت عايزه …. في أرض الفيلا بتاعتي
ابرام : الارض بتاعتك مش علي الطريق …. ايه رأيك لو عملنا علي الارض دي محطه
بنزين وتصليح وزي ما انت شايفه أعطال كتير بتحصل علي الطريق ومفيش حد
يستغني عن البنزين ….. وأنا متأكد ان إحنا ها نكسب كتير أوي انتي اتدخلي بالارض
وأنا برأس المال ها قلتي ايه
ايزابل : أنا موافقه …. بس لازم تيجي تشوف الارض الاول …… ودلوقتي
أنا هاروح أشوف الميكانيكي اللي اتصلت بيه جه ولا لأ علشان
يصلح العربيه بسرعه لان انا شايفه انك معندكش وقت (تخرج)
ابرام : برافو عليكي كده انتي فهمتيني ….. اه لو تمت الصفقه دي تبقي دي أكبر صفقه
عملتها في حياتي
(تدخل لولو قبل ان ينهي حديثه)
لولو : صفقت حياتك ....... قصدك ايه
ابرام : قصدي الفلوس طبعا .......... المال والسلطان
لولو : وعلي كده انت حاسس انك بتعمل الحاجه دي لحياتك
ابرام : طبعا
لولو : وياتري هاتربح العالم كله
ابرام : انتي مسمعتيش عن أغني واحد في العالم أهوده العالم كله بين ايديه ........ ليه انا
ماأبقاش ذيه
لولو : لكن انت خادم ........... وربنا فين في حياتك
ابرام : انا بفلوسي ممكن أخدم ربنا بيها ..... وأبني كنائس وأدي الفقراء والمساكين وعلي ما
أعتقد ان الحاجات دي كلها بترضي ربنا
لولو : لكن تتوقع معايا ان ربنا محتاج اموالك دي او عايزها
ابرام : قصدك ايه
لولو : انت بتسعي وبتجري علشان حاجه زايله ممكن اللصوص يسرقوها أو حتي السوس
ياكلها .......... انت تعرف ان في حاجه أغلي من كل ده
ابرام : وايه الحاجه دي
لولو : الابديه ودي أعظم حاجه في الدنيا ممكن تربحها ولو جبت ورقه وقلم وقعدت تحسبها هتلاقي الحسبه صحيحه بعد اذنك
ثم تخرج ويغلق الستار
الفصل الثالث
المشهد الأول
يفتح الستار علي خلفيه مغارة
الريس : طمنيني يا ايزابل ....... ايه الاخبار
ايزابل : كله تمام يارئيس ذي ما انت قلت بالظبط ..... بحثت علي نقطه ضعف كل واحد منهم
وقدرت ادخل منها ........ منهم اللي تعبني ومنهم اللي جه لحد عندي ..... وكلهم بقوا
في قبضه ايدينا
الريس : انا كنت عارف انك هاتقدري تعمليها وعلشان كده كلفتك بالمهمه دي
وانتم يا أعواني كلهم معا ما عدا ايزابل تلاميذك ياريس
ايزابل : بس ...... ياريس
الريس : بس ايه ......... انطقي يا ايزابل
ايزابل : فيه مشكله ممكن تهد كل اللي عملناه
الريس : ازاي يعني .... وضحيلي أكتر
ايزابل : في البيت المستخبي فيه الخدام دول فيه شويه معوقين انا خايفه منهم قوي يا ريس
الرئيس : معوقين .... انت بتقولي ايه ..... احنا بعظمتنا وبقوتنا وبسلطاننا نخاف من شويه
معوقين
ايزابل : لا ....... ياريس ... انا حاسه انهم مش لوحدهم دول مسنودين علي حاجه كبيره انا
حاسيت ده من كلامهم
الرئيس : يعني تفتكري انهم مسنودين ..... واذا كان كده فعلا احنا لازم نعمل حسابنا يا سوسه
سوسه : نعم ياريس
الرئيس : انا عايزك تخشي وتتسحبي بدون ما حد يحس بيكي وتفسدى كل حاجه موجوده في
بيت المعوقين..... أي شئ يقدر يخليهم يتصلوا بالعالم الخارج... تقضيلي عليه ..ها
هتقدري علي المهمه دي يا سوسه
سوسه : عيب ياريس دا انا سوسه هادخل البيت وأفسد كل حاجه فيه
الريس : عفارم عليكي يا سوسه يا صغيره اما انت يا حنش انا عايزك تخش مع ايزابل بس
غيرشكلك علشان هما عارفينك تتلون مع كل واحد تقابله وتحط ليه السم وانت بتقنعه
ان ده دواء ليه ..... يا انا.... يا المعوقين دول
ويغلق الستار
المشهد الثاني
تفتح الستار وكل الخدام مستعدين لمغادره البيت
الام : يا اولادي .....فكروا قبل ما تعملوا كدة .......فكروا قبل ما تسيبوا البيت ...يا استاذ بو لس انا خايفة عليكم اكيد العدو برة مترصب ليكم
بولس: معلش يا امي ان مش حاسس بسعادة في المكان دة الاسود دة
دميانة: انا مش هقدر استحمل دقيقة واحدة في المكان دة .... شايفين التراب والسواد اللي في
كل حتة
راعوث: احنا لوحدينا هنا مش في امان ابدا ......ومتزعلوش مني انتو شوية .... مش هتقدروا
تحمونا
إبرام: وبعدين اية فايدة قاعدتنا هنا.....هنا مفيش اى فايدة بل على العكس احنا كل دقيقة بتعدى
علينا هنا بنخسر
الام : استنوا عندكم انتوا اولاد المسيح ازاى بتقولوا كدة انت نسيت يا بولس اسمك على اسم
مين اسم اعظم فيلسوف في المسيحية اخواتك محتاجينلك .....المفروض تكون قائد
حقيقى ليهم عامل بالكلام الى بتقولة .......
شوشو: يااختى دميانة .... بتنظر لية للمنظر الخارجي .... رغم أني وريتك الجمال الداخلى
لبيتنا من محبه موجوده بينا وتضحيه وبذل وعطاء وتواضع .
دميانه : اه كل ده كويس بس الناس مابتبصش لده .... بتبص للجمال الخارجي
شوشو : انتي نسيتي الشهيده دميانه اللي اسمك علي اسمها اللي تركت كل شئ ... الجمال والمال والسلطه علشان تبقي عروس للمسيح ... هو ده الجمال الحقيقي في التصاقنا بالمسيح
كركر: تعطي المسمار وعود الثقاب لراعوث
راعوث : تاني يا كركر انا مش فاهماكي
كركر : المسمار هو المسيح المصلوب وعود الثقاب هو احنا و الفتله هي الاسرار الكنسيه
اللي بتربطنا بالمسيح ( بالاشارات )
راعوث : اه فهمت يعني قصدك انا لوحدي بدون المسيح هابقي سهله الكسر ذي عود الكبريت
واللي بيربطنا بالمسيح هو التناول والاعتراف يعني أسرار الكنيسه وبكده محدش
يقدر يكسرني ابدا
لولو : حسبت الحسبه اللي قلتلك عليها
ابرام : انا لسه هابص علي المستقبل ... انا عايز أعيش حياتي أنا لسه صغير والدنيا كلها بين
ايديا
لولو : وقال أعمل هذا اهدم مخازني وابني اعظم وأجمع هناك جميع غلاتي وخيراتي وأقول
لنفسي يا نفسي لك خيرات كثيره موضوعه لسنين كثيره استريحي وكلي واشربي وافرحي . فقال له الله يا غبي هذه الليله تطلب نفسك منك فهذه التي اعددتها لمن تكون
(لو 12: 18- 20)
ابرام : يعني قصدك ان انا .................. (ويصمت )
لولو : ماذا يعطي الانسان فداء عن نفسه (مر 8 : 37) ايه فايده انك ربحت العالم كله في وقت انت مش حاسس ان نفسك تؤخذ منك ...... هاتخسر كل شئ ......
لا تقدرون ان تخدموا الله والمال .
الأم : انا سوداء و جميلة يا بنات اورشليم كخيام قيدار كشقق سليمان (نش 1 : 5)
لا تنظرن الي لكوني سوداء لان الشمس قد لوحتني بنو امي غضبوا علي جعلوني ناطورة الكروم اما كرمي فلم انطره (نش 1 : 6)
( يخرجون جميعا ثم تدخل سوسه )
سوسه : كده انا أفسدت كل شئ وقطعت كل الاسلاك .... كده اقدر ابلغ الرئيس وايزابل
وحنش علشان يستعدوا ( وتخرج ثم تدخل ايزابل وحنش وتنادي علي الخدام )
ايزابل : يا معلم بولس .... يا انسه دميانه ....يا استاذه راعوث .... يا ابرام بيه
(يدخلون الواحد تلو الاخر)
ايزابل : أعرفكم .... جوزي
حنش : اهلا وسهلا بيكم علي فكره ايزابل حكتلي علي كل واحد فيكم وانا عارف طلابتكم كلها
انت يا بولس هاعملك فصل خدمه كبير علشان يليق بيك وتقدر تخدم كويس
وانت يا دميانه هاتشوفي احلي واحدث خطوط موضه واجمل مناظر شفتيها في حياتك
وأنا مش ناسيكي يا راعوث الامان اللي انت بتضوري عليه هاتلاقيه عندنا
أما انت يا ابرام بيه فصفقتك معايا انا
بولس : معلش احنا اسفين .. مش ها نقدر نسيب البيت
حنش : ايه بتقول ايه .. مش هاتقدر تسيب البيت
ايزابل : ازاي بقي الكلام ده بعد كل التعب اللي تعبناه علشانكم ... مش ها تسيبوا البيت...
ايه اللي عاجبكم في البيت ده ...... ده مفهوش أي حاجه حلوه .... ده كله الم وضيق
دميانه : احنا اكتشفنا الجمال الحقيقي في البيت ده
راعوث : ولو ضورنا في أي مكان تاني علي الامان مش هنلاقيه غير هنا
ابرام : احنا عرفنا الكنز المخفي مكانه فين .... مكانه هنا في البيت ده
ايزابل : لا ..... لأ ....... كده هانخسر ...... ياريس ......... يارئيس هذا العالم
يدخل الرئيس ومعه سوسه
الرئيس : لأ .... انتو لينا مش بعد التعب ده كله هاتهربوا منا احنا قدمنا لكم كل انتوا عايزينه
وجه الوقت علشان تدفعوا الثمن ...... انتوا لينا
الام : بأسم الرب يسوع الذي سحقكم علي الصليب وجعلنا منتصرين بقوه فداءه نأمركم ان
تتركوا هذا البيت بيت الله واولاده لانه مكتوب
الاربعه معوقين : و على هذه الصخرة ابني كنيستي و ابواب الجحيم لن تقوى عليها
(مت 16 : 18)
ثم تخرج العصابة وهي تصرخ ويصيح الرئيس
لسه ..... لسه الحرب مانتهتش
موضوع: الكنز المخفى 