علمنى اشكرك يارب
رب كتير ساعات بقعد افكر هل انا بشكرك
كتير بقول اشكرك يارب على حاجات بتحصل فى حياتى
لكن لما بقعد مع نفسى ببقى عاوز اقول كل لحظة اشكرك يارب
نفسى اعلم قلبى ازاى كل نبضة فيه تنطق و تقول اشكرك يارب
اشكرك يارب على كل حاجة بتمر فى حياتى
اشكرك يارب انك خلقتنى ابنك و فى حضنك و بتعد لى ابديتك
اشكرك لأنك بتسمحلى اكلمك و اشكيلك و احكيلك و تسمعلى فى كل كلمة .. و انت ملك الملوك و رب الارباب
اشكرك لأنك بتغفر لى كل كسل و تهاون فى حياتى الروحية معاك
أشكرك لأنك بتستحملنى وقت تعبى و مش بقدر اتكلم معاك و اقف اصلى رغم انك بتكون مشتاق انى اكلمك
لأنك خلقتلى عنين و ايدين و قلب جميل و وودان و خلقتنى حلو و جميل
اشكرك على كل وظيفة فى جسمى ماشية بنظام و ترتيب
اشكرك عشان فديتنى و نجيتنى من عبودية الظلام
اشكرك على كل جلدة أو اشكرك على كل دقة مسمار أو اشكرك على كل شوكة
اشكرك على صليبك اللى بقالى انا قوة
اشكرك على انك اتحملت العار مكانى و انا بهرب من قدامك وقت الصليب و بنسى كل يوم خطيتى اللى بتغفرهالى
مش عارفة اشكرك على ايه ولا ايه
هو انت ازاى كده. ازاى تعملى كل ده .. ازاى تتحمل منى كل ده
ازاى كده قلبك حنين و عطوف و رقيق .. ازاى عنيك مليانة جمال و محبة و قوة .. ازاى ايديك مليانة راحة و حنان .. ازاى حضنك مليان دفا و تعزية .. ازاى اسمك مليان قوة و رهبة
عشان انت القدوس
طب اشكرك انك بتحفظنى كل يوم و بتحقق وعدك " يحفظ دخولك و خروجك" مز121: 8
ولا اشكرك على ترتيب احداث حياتى
حتى و لو فى وقت حسيت ان مش هو ده اللى انا عاوزه .. حتى لو حسيت انى مش مرتاح
على طول قلبى يفكرنى انت عملت معايا ايه قبل كده .. و ابقى مكسوف من نفسى قوووى ازاى انا مش بشكرك
السنة دى تكون فعلا سنة الشكر
اشكرك على الحزن و الضيق و التجارب
اشكرك على الفرح و الفرج و النعيم
اشكرك على الفشل و النجاح
اشكرك على انك خلقتلى قلب يتعلم يشكرك
بقعد افكرك لو قضيت عمرى كله فعلا اقولك اشكرك .. معتقدش انها هتوفى كل اللى بتعمله معايا
كتير بتمر ازمة فى حياتى .. بنهار و بقع و مش ببقى عارف اقوم .. لكن بلاقى ايديك الحنينة بتلم كل جرح و تحط عليه البلسم بكل رقة ..
حتى لو حسيت انى مش لاقي تعزية .. بحس بعينك جوايا بتقولى انا هنا
اشكرك يارب
اشكرك يارب على كل لحظة فى حياتى
كل لحظة .. كل ساعة و كل دقيقة و كل ثانية
يارب كتير بتمر ازمات فى حياتى .. مش ببقى عارف سببها او اتعلم منها ايه .. و لما بحاول افهم بتعب قوى .. و لما بحاول افكر فيها بعقلى البشرى المحدود بتعب اكتر و اصرخ بصوت عالى و دموع كتيرة و اقول ليه كده؟؟؟ .. بس بعد ما بصرخ الاقيك تطبطب على و تقولى تعال ارتاح عندى فاجيلك .. و بعدها الاقى لسانى يقولك اشكرك ..
يارب من انا حتى افهم حكمتك..من انا حتى اسألك لماذا .."شرعت ان اكلم المولى و انا تراب و رماد" تكوين18: 27.. والاقى نفسى برضه تقولك انا مش عاوز افهم .. انا عاوز اتعلم اشكرك
شكراً ليك يارب
قد ايه هى كلمة مكونة من 4 حروف .. صغيرة بجد .. بس تريح بجد
يارب انا جاي النهاردة بصرخ ليك و اقولك .. عاوز اتعلم اشكرك فى كل وقت .. حتى لو مش فاهم ليه بيحصل معايا كده او ايه اللى بيحصل حوالى
عاوز اشكرك
اجعلها سنة الشكر فى كل حال و على كل حال و من اجل كل حال
و سامحنى و اغفرلى تذمرى و عدم رضاى بالامور و الأحداث
و اعطى قلبى من السكينة و الهدوء و السلام و الاتساع ليتسع لكل شئ حتى يشكرك على كل شئ
و اكون سراجاً دائما على المنارة ليوقد لكل الذين هم فى حياتى
فى الاخر هاقولك
أشكرك يارب
موضوع: علمنى اشكرك يارب