ظهور العذراء

هذه القصة رواها لى احد العاملين بالعمليات بمستشفى التخصصى امس وهو مسلم
س:"يادكتور ممكن اسألك فى الدين ؟"
ب:"خير"
س:"انا امبارح وانا ماشى فى الخصوص جنب بيتنا لقيت ناس كتيرة متجمعة فافتكرت ان فى خناقة فقربت لقيت ناس كتير بصة فى السما فقربت لقيت ناس بتقول العدرا بتظهر فسألت واحد من الواقفين"فين؟ "فشاور فى السماء
فبصيت لقيت نور ابيض بيتحرك رايح جاى مابين كنيسة العدرا الخصوص و كنيسة العدرا مسطرد"
ب: "ما جايز يكون ليزر حد بيلعب بيه؟"
س: "استنى يادكتور ما المسلمين اللى كانوا واقفين كانوا بيقولوا كده لكن واحنا واقفين لقينا كرة صفرة دهبى على بعد كبير يجى 5 كيلو قعدت تكبر تكبر لغاية مابقت منظر نور حلو قوى دهبى
ب: " متأكد يعنى؟"
س: "يادكتور لو مليون واحد قالى العدرا بتظهر مش هصدقهم لكن اللى شفته امبارح منظر محدش يقدر يتخيله"
المهم سمع الجراحين الحوار ده فنادوا على العامل ده قالوا احكى لنا عن اللى حصل
فقعد يحكى وبكل حماس قعد يأكد ظهور العدرا
فقاطعه احد الممرضين المتعصبين "وازاى العدرا تظهر والحبيب المصطفى ميظهرش اكيد دى كدبة"
وهنا اتوقف عن الكتابة تاركا لكل من يقرأ هذا الموقف فرصة للتفكير والتأمل والفرح والصلاة والتهليل
"وان سكت هؤلاء فإن الحجارة تصرخ"
اشكرك يا الهى الحنون على كل حبك ورعايتك على طول اناتك على شكرا على انك مش سايبنا وسط العالم الشرير لوحدنا
شكرا على القديسين اللى محوطينا وبيسندونا
شكرا على صوتك الحلو وقوتك اللى اقوى من كل الناس الاشرار اللى بيعيروا المسيحية والكنيسة واولادك وبناتك
شكرا ليك ان امك السيدة العذراء واقفة جنبنا احنا الخطاة وبتسندنا
"ليس لنا دالة عند ربنا يسوع المسيح سوى شفاعاتك وطلباتك "
صلوا من اجلى